عاوز تعرف صاحبك
الاول لازم تعرف اننا كلنا فينا عيوب ومميزات
يعني كلنا بنجمع بين الصفات المتناقضه
كل شخص جواه جزء من كل الصفات
يعني حتلاقي جواك صفه الكرم والبخل
وحتلاقي الذكاء والغباء والشهامه والنداله
وكل الصفات موجوده بنسب متفاوته
والصفه اللي بتطغي علي باقي الصفات هي دي الصفه المميزه للشخصيه
مفيش شخص خير على طول الخط مفيش حد ملاك ناقص له جناحين ويطير
ومفيش شخص شرير على طول الخط عنده ديل وبقرون
تعالي بقي طبق الكلام ده علي صحابك
وحدد كل واحد ايه الصفه المسيطره فيه
صاحبك البخيل
تلاقيه دايما اخر واحد يحط ايده في جيبه وانتم قايمين من علي القهوه
علشان تحاسبوا القهوجيه
صاحبك الغبي
اخر واحد يضحك علي نكته قالها واحد تاني وتلاقيه بيضحك بصوت عالي
صاحبك المغرور
دايما يتكلم عن انجازاته اللي عملها
ودائم التحدث عن المهارات اللي عنده
ومش عند غيره وتلاقي امكانياته اقل بكتير من الي بيحلم يحققه
صاحبك البكاش
الكذاب نسااي يعني يحكي لك حاجه النهارده
وتاني يوم يحكي لك نفس الحاجه بصوره تانيه خالص
صاحبك الندل
اول واحد يستخبي منك لما تحتاجه وبتكون فى الحزن مدعي والفرح منسي متلقهوش ومايقفش معاك فى اي مشكله او خناقه او محنه
صاحبك المنسون
تلاقي ديما بيبدي اي بنت عنك حتى ولو كانت رقاصه فى كباري وبيحاول يظهر قدام البنات انه حامي الحمي
صاحبك الخاين
تلاقيه دايما بيمدح فيك قوي بس تلاقي بيزمك فى ضهرك وكل شويه حد يجيلك يقولك صاحبك بيشتمك من وراك
صاحبك الحقود
قليل الكلام علي وجهه ابتسامه مالهاش ملامح
ديما بيقولك يا الغالي
يفرح فوي لما تتمسك في خانه اليك
وانت بتلعب طاوله وهو بيتفرج عليك او حد بيكون بيغلط فيك قدامه
صاحبك اللي تصاحبه
هو اللي تلاقيه وقت الضيق
اللي يحب لك الخير
اللي ما يزعلش لما يلاقيك ناجح
اللي ينصحك ويشدك ناحيه الخير والالتزام
اللي يزعل لزعلك ويفرح لفرحك
اللي يرد غيبتك
اللي تحس انه اكتر من اخوك
والمثل بيقول
اعـرف صـاحــبك وعـــلم علـــيه
السبت يناير 17, 2009 11:26 pm
