مين ياخد قلبى المليان ..ويدينى قلبى الفاضى؟؟

عمرك فكرت تبيع قلبك وتشترى مكانه واحد جديد واحد مش مهموم ومش مجروح ولا شايل من الدنيا ولا من الى فيها قلب رايق لسه بيبص للدنيا ويضحك ومفيش حاجه شغلاه قلب جديد لما يقابل ناس بعينهم ميفكركش بحاجات وحشه ولا يوجعك ولا يقولك ايه الى جابك هنا قلب ميكشرش فى وشك لما تقابل ناس مضطر تقابلهم وهوه مش طايقهم , كل واحد فينا قلبو فى حاجات كتير من اول بنت الجيران او ابن الجيران الى اتجوز بعد الكلام فى البلكونات طول الليل والوعود المكتوبه جوه ورق الدروس الى كنا بنديه لبعض كل قلب لسه شايل حته من حب الجامعه والتزويغ من المحاضرات ودخول حفلات السينما الصباحيه والرحلات والتوصيل بعد التأخير لحد قبل البيت بناصيتين على شان محدش يشوفنا مع بعض , كل قلب شايل جرح او اتنين او اكتر وحتى القلوب الى متجرحتش بتنزف على شان مفيش حد قرب منها على شان يجرحها
( قلوب مجروحه على شان معرفتش طعم الجرح) كل واحد فينا قلبه شايل حاجات كتير شايل مشاكل فى الشغل مع المدير الى عايزك تعمل كل حاجه فى الدنيا بأقل سعر ولو مش عاجبك فى الف واحد عايزين يعملوا الى بتعملوا بنص مرتبك مشاكل فى البيت مع بابا أو ماما أو إخواتك أو كلهم مع بعض , قلوبنا شايله همومنا وأحزاننا وآمالنا ورايحه معانا فى كل حته أول ماتروح مكان جديد تفضل شويه كويسه لحد بس ما قلبك ياخد على المكان ويبدأ يحط فيه من الى هوه شايله شوية هموم على المخدة شوية أحزان على الشماعة وشوية آمال تشوفهم في وشك على المرايه وتتوجع على شان مش عارف تحقق حاجه منهم , قلوبنا بقت بتوجعنا أو إحنا بنوجعها مش فارقه المهم إن إحنا مش مرتاحين مع بعض بس هل المشاكل الى بين الواحد وقلبه تخليه يقول إنه هيبيع قلبه أو يستغنى عنه ويجيب قلب جديد يعيش معاه ويكون معاه ذكريات جديدة , يعنى تعرف تعيش من غير أحلامك وأوجاعك القديمة ولا كل الى انتا عشته هوه الى عملك , همومك وآلامك وأوجاعك وأحلامك وطموحاتك وإحباطاتك إتخلطت على بعض وبمرور الوقت بقت هيه الى بتشكل تصرفاتك وخلتك البنى آدم الى أنتا عليه دلوقت تحب حد ياخد قلبك المليان بكل الحاجات دى ويديلك بداله قلب فاضى جديد تعيش بيه من الأول ولا انتا عايز قلبك بكل الى هوه فيه على شان هوه ده إنت ومتعرفش تعيش من غيره؟؟!!
المصدر :موقع تيت راديو"أحمد الهوارى". .

يارب فكرة الموضوع تعجبكم

على فكره فكرة الموضوع جميله بس مش فى السن ده خااااالص