!* الكفتة فى القرآن *!

الكفتة فى القرآن.. والقدسية الضائعة !

أحمد حربية ... من موقع: تيت راديو

النهاردة وأنا جاى تيت راديو ، ركبت عربية مكتوب عليها : " يا بنى إركب معنا ولا تكن مع الكافرين " .. شفتوا الابداع ؟! شفتوا التحليل اللى من غيرسقف صحيح ؟ كلام سيدنا نوح لابنه عشان ماكانش راضى يركب معهم السفينة, بقىبكل بساطة جملة مكتوبة على عربية " ميكروباص " عشان تجيب الزباين !
الراجل سواق الميكروباص معملش جريمة أو حاجة عمرها ما اتعملت؛ هو بس جددشوية ، وقرر أن يستخدم آية مااستخدمهاش حد قبله , وهنا بقى العبقرية والفهلوة, فاستخدام الآيات والحكم استخدام تجارى هو اختراع مصرى 100% ما أظنش أنحد يقدر ينافسنا فيه .
معظم محلات عصير القصب معلقة لوحة مكتوب عليها " وسقاهم ربهم شراباًطهوراً ", وأكيد عصير القصب والتمر الهندى مش هما المقصودين طبعا بالشراب الطهور, ولكن مايضرش.. سقـّع وبيع يا أستاذ! هو يعنى بتاع عصير القصب هييجى إيه جنبالحلاق اللى كاتب عالمحل " وجوه يومئذ ناعمة ! " , ولا الترزى اللى شعاره: " نحن نقص عليك أحسن القصص " !
كله كلام ربنا, وكلام ربنا كله بركة, ده الرد اللى قالهولى صاحب عربية الكبدة بعد ما سألته: "أنت متخيل ان الكبدة والكفتة والبيض بالبسطرمةممكن يكونوا المقصودين بالآية الكريمة " كلوا من طيبات ما رزقناكم " اللى أنت كاتبها على عربيتك ؟", ورديت عليه فى نفسى " ماشى ياعم المؤمن , ربنا يكملك بإيمانك أنت واللى زيك ", واللى زيه كثير مايتعدوش, اللى زيه سواق تريللا كاتب على عربيته " ربنا ولا تحملنا ما لا طاقة لنا به! " واللى زيه صاحب محل فاكهة كان عنده كمية بلح سوقها مش ماشى..وكان جنبه محل سمك شغال الله ينور , فالفكهانى قرر يستغل نجاح محل السمك عشان يصرف كمية البلح اللى عنده بس إزاى ؟ , تقريباً فرّ المصحف كله ملقاش آية تربط بين السمك والبلح - ما استسلمش - وقرر انه يتصرف, فعلـّق علىالمحل بتاعه من بره لوحة كبيرة مكتوب عليها " إذا أسمكتم فأبلحوا! "
أنا عارف أن فيه ناس كثيرة من اللى بيسمعونا دلوقتى "هيكفرونى" أنا والرجل الفكهانى, مع أنى ماعملتش غير أنى قلت اللى شفته, ومع أن الرجل ماقالش ان دى آية أو حديث, هو بس كتب الجملة بصياغة و "صياعة" توصل لك إن الكلام ده له قدسية ما . طبعاً ما حدش هيدور وراه, والبلح هيتباع والكل هيبقىمبسوط .
يعنى مشيها وعديها , وعدى معها " إن أريد إلاالإصلاح ما استطعت " واللى بتكتب على كل اليفط الإنتخابية تقريباً, وعدى معاها " وجعلنا من بين ايديهم سدا ومن خلفهم سدا " اللى ما بنفتكرهاش الا لما نتزنق فى ماتش ونلعب ضربات جزاء مع الفريق اللى ماعرفش يقطعنا واضطر يلاعبنا بلنتيات !بس يا ترى لو احنا عدينا كل ده , فى حد هيعدى لتييت راديو أنها تعمل إعلان وتكتب عليه " لا يسمعون فيها لغواً ولا تأثيماً".. سؤال لولبى مش كده؟ خلى الاجابة فى سرّك !