ياشعبى حبيبى
ياشعبى حبيبى ياروحى يابيبى ياحاطك فى جيبى يابن الحلال
ياشعبى ياشاطر ياجابر خواطر ياساكن مقابر و صابر و عال
ياواكل سمومك يابايع هدومك ياحامل همومك وشايل جبال
ياشعبى اللى نايم وسارح وهايم وفى الفقر عايم وحالة دة حال
احبك محشش مفرفش مطنش ودايخ مدروخ واخر انسطال
احبك مكبر دماغك مخدر ممشى امورك كدة باتكال
واحب اللى ينصب واحب اللى يكدب واحب اللى ينهب ويسرق تلال
واحب اللى شايف وعارف وخايف وبالع لسانة وكاتم مقال
واحب اللى قافل عيونة المغفل واحب البهايم واحب البغال
واحب اللى راضى واحب اللى فاضى واحب اللى عايز يربى العيال
واحب اللى يائس واحب اللى بائس واحب اللى محبط وشايف محال
واحبك تسافر وتبعد تهاجر وتبعت فلوسك دولار او ريال
واحبك تطبل تهلل تهبل عشان مطش كورة وفيلم او مقال
واحبك تايد تعضد تمجد توافق تنافق وتلحس نعال
تحضر نشادر تجمع كوادر تلمع تقمع تظبط مجال
لكن لو تفكر تخطط تقرر تشغلى مخك وتفتح جدال
وتبدا تشاكل وتعمل مشاكل وتنكش مسائل وتسال سؤال
وعايز تنور و عايز تطور و تعمللى روحك مفرد رجال
ساعتها هاجيبك لا يمكن هاسيبك وراح تبقى عبرة و تصبح مثال
هابهدل جنابك واذل اللى جابك وهيكون عذابك دة فوق الاحتمال
وامرمط ساعادتك واهزأ سيادتك واخللى كرامتك فى حالة هزال
وتلبس قضية وتصبح رزية وباقى حياتك تعيش فى انعزال
هتقبل هاحبك هترفض هلبك هتطلع هتنزل هاجيبلك جمال
الأحد سبتمبر 28, 2008 2:43 am
